Мақомоти шаҳрдории Душанбе барои харидани 15 адад нақлиёти барқӣ (троллейбус)-и тамғаи «Оптима» ва 15 адад машинокомплекти нақлиёти барқии ҳамин тамға барои насб ва истеҳсоли минбаъда дар КВД «Насби нақлиёти барқӣ (троллейбус) ва велосипед»-и шаҳри Душанбе маблағ ҷудо намуд.
Бино ба иттилои хадамоти матбуоти мақомоти шаҳрдории пойтахт, машинокомплекти нақлиёти барқӣ барои истеҳсоли троллейбусҳо ба маблағи 9 млн. 408 ҳазор сомонӣ аз ҶДММ «Тролза-Маркет»-и шаҳри Энгелси Русия харидорӣ шуда, ҷиҳати харидани 15 адад троллейбуси тайёри тамғаи «Оптима» аз буҷети шаҳр 9 млн. 555 сомонӣ маблағ ҷудо шуд.
«Троллейбусҳо дар КВД «Насби нақлиёти барқӣ (троллейбус) ва велосипед»-и шаҳри Душанбе истеҳсол гардида, ин дар навбати худ, ба фароҳам сохтани ҷойҳои нави корӣ барои аҳолии пойтахт мусоидат мекунад», – зикр мегардад дар иттилои мақомоти шаҳрдорӣ.
