Раиси Суди олии иқтисодии ҷумҳурӣ Наим Мансуров бар ин назар аст, ки аризаи даъвогии намояндагони зиёиён нисбати муҳаррири ҳафтавори «Азия-Плюс» Олга Тутубалина ҳам ба салоҳияти суди иқтисодӣ ва ҳам ба салоҳияи суди умумӣ дохил мешавад.
«Ин даъво ба суди иқтисодӣ низ дахл дорад, вале то куҷо он асоснок шудааст, мо алҳол намедонем», – иброз дошт имрӯз зимни нишасти хабарӣ Н.Мансуров.
Ӯ зикр кард, ки қарор дар бораи қабули арзиаи даъвогиро мутобиқи моддаи 30-и Кодекси мурофиавии иқтисодӣ танҳо судя қабул мекунад.
Дар ҳамин ҳол, дар номаи имрӯз ба идораи ҳафтавори «Азия-Плюс» расида аз намояндаи даъвогар Рустам Устобоев зикр мегардад, ки бинобар сабаби пешниҳоди даъво бо забони русӣ, Суди иқтисодии Душанбе аз 11 июли соли равон бо таъиноти худ аризаи даъвогиро бидуни баррасӣ боқӣ гузоштааст.
Ба гуфтаи адвокат, барои бартараф намудани камбудиҳо ба даъвогар то 22-юми июли соли ҷорӣ муҳлат дода шудааст. «Аризаи даъвогӣ ба истеҳсолот қабул шуда, вале бинобар сабаби бо забони русӣ пешниҳод шудани он, ариза бояд бо забони давлатӣ пешниҳод гардад», – зикр кард Устобоев.
Ба нома таъиноти Суди иқтисодии шаҳри Душанбе бо имзои судя Фаррух Хоҷаев замима шудааст, ки дар он оид ба боздоштани баррасии аризаи даъвогӣ сухан меравад.
Ёдрас мекунем, ки чанде қабл иттилоъ дода будем, ки суди иқтисодии шаҳри Душанбе даъвои намояндагони зиёиён нисбат ба муҳаррири ҳафтавори «Азия-Плюс» Олга Тутубалинаро
рад кард.
Қобили зикр аст, ки намояндагони зиёиён нисбати муҳаррири ҳафтавори «Азия-Плюс» Олга Тутубалина оид ба ҳифзи шаъну эътибор ва мартабаи корӣ ба Суди иқтисодии шаҳри Душанбе аризаи даъвогӣ пешниҳод намуда, дар он дархост намуданд, ки аз ҷавобгар ва ҳамҷавобгар (ҳафтавори «Азия-Плюс») барои расонидани зарари маънавӣ дар ҳаҷми 200 ҳазор сомонӣ ҷубронпулӣ ситонида шавад. Даъвогарон ҳамчунин таъини ташхиси судии лингвистӣ ва ҷиҳати таъмини даъво ҳабси амволи манқул ва ғайриманқули Олга Тутубалинаро низ хоҳиш карданд. Даъво ба мақолаи Тутубалина дар ҳафтавор таҳти унвони «Ғайризиёиёна дар бораи зиёиён» (Неинтелегентно об интеллигенции) асос ёфтааст.
Даъвогари асосӣ Иттиҳоди нависандагони Тоҷикистон ва ҳамдаъвогарон Академияи улуми ҶТ, Иттиҳоди рассомон, Иттиҳоди оҳангсозон, Иттиҳоди меъморони Тоҷикистон ва номзади улуми тиббӣ, корманди Донишгоҳи давлатии тиббии Тоҷикистон Дилбар Абдиева мебошанд.
