Раиси ноҳияи Қубодиён Саъдулло Бекназаров аснои нишасти хабарӣ иброз дошт, ки боиси афзудани ҷонибдорони гурӯҳҳои экстремистӣ дар деҳаи Қизил Нишон як авлод аст, ки худро наберагони паёмбар Муҳаммад (с) меноманд.
Бекназаров зимни сӯҳбаташ бо хабарнигорон гуфт:
«
Мо сабабҳои гаравидани ҷавонони ин деҳаро ба Ҳаракати исломии Ӯзбекистон (ҲИӮ) таҳлил карда баромадем. Муайян гардид, ки як авлод ҳанӯз солҳои Шӯравӣ аз шаҳри Тошканд ба ин деҳа омадааст ва баъдан сабаби гаравиши ҷавонон ба ин ҳаракати мамнӯъи исломӣ шудааст. Намояндагони он худро авлоди ҳазрати Муҳаммад (с) меноманд. Бештари нафароне, ки ба ҲИӮ гаравидаанд, аз ҳамин авлоданд
»
.
Тибқи иттилои прокуратураи вилояти Хатлон, дар шаш моҳи соли равон 15 парвандаи ҷиноятӣ вобаста ба экстремизм нисбат ба 21 нафар оғоз гардидааст. Аз ин шумор 15 нафар аз деҳаи Қизил Нишони ноҳияи Қубодиён мебошанд. Дар тайи чанд соли охир даҳҳо нафар аз ин деҳа бо ҷурми узвият ба ҲИӮ боздошт гардида, ба маҳбас фиристода шудаанд ва даҳҳо нафари дигар дар кофтуков қарор доранд.
