Дар ноҳияи Шаҳринав бо иштироки Эмомалӣ Раҳмон корхонаи нави коркарди нафт ва истеҳсоли маҳсулоти тайёр ба кор шурӯъ кард.
Тавре дафтари матбуоти сарвари Тоҷикистон иттилоъ медиҳад, ин корхона бо дастрас намудани навтарин намунаҳои технологияи классикии коркарди нафт аз Федератсияи Русия дар якҷоягӣ бо соҳибкорони хусусии ин кишвар аз шаҳри Томск дар 10 га замини бекорхобида бунёд ёфтааст. Барои сохтмони он 70 миллион сомонӣ сарф шудааст.
Бо иқтидори кунунияш корхона имкон дорад, ки дар як сол 100 ҳазор тонна нафти хомро коркард намуда, аз он ду навъи сӯзишвории дизелӣ (тобистона ва зимистона), бензини навъи АИ 80 ва мазути аълосифатро истеҳсол кунад.
Ояндаи наздик иқтидори корхона ба 300 ҳазор тонна дар як сол ва шумораи коргарон ба 300 нафар расонда мешавад. Сарвари давлат Эмомалӣ Раҳмон дастур дод, ки ин кор то охири соли 2014 анҷом дода шавад.
Э. Раҳмон имрӯз дар ҷараёни сафари корияш ба ноҳияҳои Шаҳринав ва Ҳисор ҳамчунин дар ифтитоҳи як толори наву муосири варзишӣ ширкат варзид.
Чунонки зикр гардид, ин толори масоҳати умумиаш 1200 метри мукааб бо харҷи қариб 2 миллиону 700 ҳазор сомонӣ маблағҳои буҷети маҳаллӣ бунёд ёфта, барои 22 намуди варзиш пешбинӣ шудааст.
