Аз рӯи натиҷаҳои нимсолаи аввали соли равон ҳаҷми умумии қарзии дохилии давлатии Тоҷикистон 2 млрд. 745 млн. сомониро ташкил медиҳад, ки ба 6,5%-и Маҷмӯи маҳсулоти дохилии кишвар баробар аст.
Тавре аз Вазорати молияи ҶТ хабар доданд, имсол барои пардохти қарзи дохилӣ ҷудо гардидани 83,1 ҳазор сомонӣ дар назар аст, ки пурра барои пардохти фоизҳои векселҳои давлатӣ таъин шудааст ва дар нимсолаи аввал баҳри пардохти он аз буҷети давлатӣ 24,7 ҳазор сомонӣ маблағ равона гардидааст.
«Сохтори қарзи дохилии давлатӣ натанҳо аз векселҳо, балки аз коғазҳои қимматноки қарзи давлатӣ, ки ба ивази талаботи қарзӣ оид ба пахта ба бонкҳои тиҷоратӣ ҷудо шудаанд, низ иборат мебошад», – гуфтанд дар Вазорати мазкур.
Зимнан зикр гардид, ки ба сохтори қарзи дохилии давлатӣ ҳамчунин вомҳои Бонки миллӣ ва эмиссияи облигатсияҳои вомҳои бурдноки дохилии давлатии ҶТ ва ҳамчунин коғазҳои қимматноки нашри соли 2012-и БМТ ба маблағи 280 млн. сомонӣ низ дохил мешаванд.
Аз рӯи натиҷаҳои нимсолаи аввали соли 2013 қарзи дохилии Тоҷикистон аз векселҳои хазинадории Вазорати молияи ҶТ дар ҳаҷми 153,7 млн. сомонӣ, облигатсияҳои вомҳои бурдноки дохилии давлатии ҶТ – 10 млн. сомонӣ, векселҳои давлатии Вазорати молия (хоҷагиҳои пахтакор) – 295 млн. 48,9 ҳазор сомонӣ, векселҳои хазинадории Вазорати молия – 280 млн. сомонӣ, векселҳои Вазорати молия барои сармоягузории дубора ба ҶСК «Агроинвестбонк» – 500 млн. сомонӣ (муҳлати пардохт то соли 2020) ва 200 млн. сомонӣ (муҳлати пардохт то соли 2017) ва векселҳои оддии Вазорати молия – 1 млрд. 305 млн. 702,5 ҳазор сомонӣ иборат аст.
