Таҳияи буҷети давлатии Тоҷикистон барои соли 2014 дар марҳилаи анҷомёбӣ қарор дорад.
Тавре ба ОИ «Азия-Плюс» аз Раёсат оид ба буҷети Вазорати молияи ҶТ хабар доданд, таҳияи ҳуҷҷати асосии молиявии кишвар барои соли оянда ахири ҳафта ба итмом мерасад.
«Пас аз маъқул шуморидани ҳуҷҷат аз ҷониби ҳайати мушовараи вазорат, ҳафтаи наздик он ҷиҳати баррасӣ ба комиссияи буҷетии ҳукумати ҷумҳурӣ ирсол мегардад», – гуфтанд дар Вазорати молия.
Ёдрас мекунем, ки ҳамасола буҷети давлатии Тоҷикистон тирамоҳ аз ҷониби палатаи поёнии парлумон дар шакли қонун барои соли навбатии молиявӣ бо пешниҳоди ҳукумати кишвар қабул мегардад.
Тибқи маълумоти пешакии Вазорати молия, даромадҳои ҷории буҷети давлатии Тоҷикистон барои соли 2014 (бидуни бурсҳо) дар ҳаҷми беш аз 10,9 млрд. сомонӣ (зиёда аз 2,2 млрд. $) пешбинӣ мешаванд.
Ҳаҷми умумии буҷети давлатии ҷумҳурӣ аз рӯи натиҷаҳои соли гузашта беш аз 9,9 млрд. сомониро ташкил дод.
Дар зарфи 7 моҳи соли равон ҳаҷми умумии буҷети давлатии ҶТ беш аз 6 млрд. сомонӣ (зиёда аз 1,2 млрд. $)-ро ташкил дод, ки 0,1% аз нақшаи пешбинишуда зиёд аст.
