Зимни мулоқоти директори Агентии назорати маводи нашъавоари назди президенти ҶТ генерал-лейтенати милиса Рустам Назаров бо намояндаи минтақавии Раёсати СММ оид ба маводи нашъаовар ва ҷинояткорӣ Александр Сичёв зикр гардид, ки ин сохтор дастгирии Агентиро то соли 2016 идома медиҳад.
Бино ба иттилои маркази робита бо ҷомеаи Агентӣ, дар мулоқот масоили марбут ба ҳамкории мутақобила дар самти мубориза бо гардиши ғайриқонунии маводи мухаддир, пешгирии нашъамандӣ ва ҳамчунин ҷараёни амалисозии лоиҳаи Раёсати мазкури СММ «Агентии назорати маводи нашъаовари назди президенти ҶТ – марҳилаи III», ки ахири соли 2013 ба итмом мерасад ва ҳамкориҳо бо Маркази минтақавии иттилоотии ҳамоҳангсозии Осиёи Марказӣ оид ба мубориза бо маводи мухаддир баррасӣ шуданд.
Ба иттилои манбаъ, чанде қабл ҳамчунин вохӯрии директори Агентӣ бо намояндаи махсуси дабири кулли СММ, роҳбари Маркази минтақавии СММ оид ба дипломатияи пешгирикунанда, сафир Мирсолав Енча низ баргузор шуд.
Зимни мулоқоти бо ташаббуси Маркази минтақавии СММ оид ба дипломатияи пешгиркунанда дар Осиёи Марказӣ барпошуда директори Агентӣ сафирро бо вазъи мухаддиротӣ дар Тоҷикистону Афғонистон ва минтақаи Осиёи Марказӣ шинос кард.
