Корҳои сохтмонӣ дар Маркази барқу гармидиҳӣ (МБГ)-и «Душанбе»-2» тибқи нақшаи пешбинишуда идома доранд.
Тавре ба ОИ «Азия-Плюс» аз Вазорати энергетика ва саноати ҶТ хабар доданд, айни замон дар сохтмони маркази мазкур 1,4 ҳазор нафар бинокорону мутахассисон машғули кор буда, ҳафтаи оянда шумори онҳо то ба 1,5 ҳазор нафар мерасад. «Дар кори сохтмон беш аз 160 адад техникаву таҷҳизоти гуногун мавриди истифода қарор доранд», – гуфтанд дар вазорат.
Ба иттилои манбаъ, то имрӯз сохтмони дегхонаи №1 ва дудбаро пурра ба анҷом расида, корҳои бетонрезӣ дар иншоот дар ҳаҷми 42 ҳазор метри мукааб ба иҷро расидаанд.
Ёдрас мекунем, ки Маркази барқу гармидиҳии «Душанбе»-2» дар доираи созишномаи сеҷониба миёни Вазорати энергетика ва саноати ҶТ, ҶСК «ТВЕА» (Чин) ва ҶДММ «ТВЕА Душанбе саноати кӯҳкорӣ» бунёд мегардад.
Иқтидори Маркази барқу гармидиҳии «Душанбе»-2» 200 МВт-ро ташкил хоҳад дод. Мавриди истифода қарор гирифтани блоки аввали марказ то оғози зимистони имсола дар назар аст.
