Дар намоишгоҳ-ярмаркаи маҳсулоти содиротии вилояти Синтзян-Уйғури Чин, ки имрӯз дар маҷмааи давлатии «Кохи Борбад» ба кор шурӯъ мекунад, беш аз 70 ширкат маҳсулоти худро ба маърази тамошову фурӯш мегузоранд.
Намоишгоҳ аз ҷониби Раёсати умури савдои берунаи назди Вазорати тиҷорати Чин, департаменти тиҷорати вилояти Синтзян-Уйғур ва маъмурияти ҳавзаи Қошғар, департаменти хоҷагии ҷангали вилояти мазкур дар ҳамдастӣ бо Палатаи савдо ва саноати ҶТ ва сафорати Чин дар Тоҷикистон созмон дода мешавад.
Дар конфронси матбуотии рӯзи 26-уми сентябр дар Душанбе муовини губернатори ҳавзаи Қошғар Ван Юн Ҷи дар ин робита изҳор намуд, ки ҳадаф аз намоишгоҳи мазкур густариши минбаъдаи ҳамкориҳои шарикона буда, баргузории чунин чорабиниҳо ба рушди муносибатҳои иқтисодиву тиҷоратӣ миёни кишварҳо мусоидат менамоянд.
Ба гуфтаи ӯ, барои иштирок дар намоишгоҳ 150 нафар намояндагони зиёда аз 70 ширкати вилояти Синтзян-Уйғури Чин ба Душанбе ташриф оварда, беш аз 70 номгӯи маҳсулоти содиротии ин минтақаи Чин ба сокинону меҳмонони Душанбе пешкаш мегардад.
Қобили зикр аст, ки дар доираи кори намоишгоҳ нимаи дуюми имрӯз дар меҳмонхонаи «Истиқлол» вохӯрии соҳибкорони Тоҷикистону Чин дар назар буда, рӯзи 28-уми сентябр маросими муаррифии шаҳраки саноатии Гуанчжоу New City доир мегардад, ки чанде қабл дар ҳавзаи Қошғар бо мақсади рушди муносибатҳои иқтисодиву тиҷоратӣ бо кишварҳои минтақаи Осиёи Марказӣ бунёд шудааст.
Намоишгоҳ-ярмаркаи маҳсулоти содиротии вилояти Синтзян-Уйғури Чин дар Душанбе маротибаи шашум доир гардида, то 30-юми сентябр идома меёёбад.
