Чанде қабл дар Душанбе маросими ба дастаи таъиноти махсуси ВКД Тоҷикистон супурдани кумаки моддии сафорати ИМА дар Тоҷикистон доир гардид.
Бино ба иттилои сомонаи расмии ВКД ҶТ, нахуст вазири корҳои дохилӣ Рамазон Раҳимов дар мулоқот бо ҳайати шахсии ДТММ иброз намуд, ки дар раванди тезутунди ҷаҳонишавӣ масъалаи мубориза бо терроризм, экстремизм, гардиши ғайриқонуни маводи мухаддир ва яроқу аслиҳа дар мадди аввал меистад, аз ин рӯ кормандони Дастаи таъиноти махсуси милитсияро мебояд, ки боз ҳам аз худ маҳорати баланди касбӣ нишон диҳанд. «Ман боварӣ дорам, ки Шумо аз иҷрои вазифаҳои хеш ва ҳифзи ҳуқуқу манфиатҳои шаҳрвандон бо иродаи матин, шарафмандонаву сарбаландона мебароед»-афзуд дар идомаи суханрониаш вазир.
Сипас, Сафири ШМА дар Тоҷикистон Эллиотт Сюзан барои ҳамкориҳои мутақобилан судманд ба Вазири корҳои дохилӣ изҳори сипос намуда, қайд кард, ки дар оянда низ ин ҳамкориҳо тақвият бахшида мешаванд.
Дар доираҳои ҳамкориҳои дуҷониба кормандони Дастаи таъиноти махсуси милитсия соли 2012 дар тренинги омӯзишӣ дар ШМА иштирок намуда, аз худ маҳорату малакаи баланди касбӣ нишон дода, сазовори таҳсину офарин гардиданд. Аз ин хотир Сафорати ШМА дар Тоҷикистон тасмим гирифт, ки барои гузаронидани машқҳои тактикӣ-омӯзишӣ ва дарсҳои таълимии афсарон ба ДТММ таҷҳизотҳои лозима, аз қабили ҷавшан, тоскӯлоҳ, ниқоб, дурбин ва дигар лавозимотҳо тақдим намояд.
Вазири корҳои дохилӣ барои ба ҷузъу томҳои ДТММ тақсим намудани таҷҳизотҳои воридгардида, дастуру супоришҳои мушаххас дода, афзуд, ки ин таҷҳизотҳои замонавӣ ҷиҳати осон намудани кору фаъолияти Дастаи таъиноти махсуси милитсия мусоидат менамоянд.
