Фраксияи Ҳизби халқии демократии Тоҷикистон дар палатаи поёнии парлумон имрӯз дар ҳайати пурра ҷиҳати вохӯрӣ бо интихобкунандагон озими манотиқи ҷумҳурӣ шуд. Ҳадаф аз сафар шарҳу таблиғи барномаи пешазинтихоботии номзад ба мақоми президентӣ аз ҲХДТ, президенти амалкунанда Эмомалӣ Раҳмон мебошад.
Роҳбари фраксияи ҲХДТ дар МНМО ҶТ Махфират Хидирова ба ОИ «Азия-Плюс» дар ин робита хабар дод, ки аъзои фраксия ҳар кадоме дар ҳавзаҳои интихоботии худ бандҳои муҳими барномаи Эмомалӣ Раҳмонро ба аҳолӣ шарҳу тавзеҳ дода, ҳамчунин дар маҳалҳо корҳои таблиғотӣ мегузаронанд.
Ҳайати палатаи поёнии парлумони Тоҷикистон аз 63 вакил иборат буда, 45 нафарашон аъзои ҲХДТ мебошанд. Ҳизби коммунист, Ҳизби аграрӣ, Ҳизби ислоҳоти иқтисодӣ ва ҲНИТ ҳар кадоме дар парлумон соҳиби ду курсӣ мебошанд. Нуҳ нафар вакилони Маҷлиси намяондагони Маҷлиси Олии Тоҷикистон ғайриҳизбианд.
Ҳизби халқии демократии Тоҷикистон соли 1994 таъсис ёфта, айни замон шумори аъзои он беш аз 230 ҳазор нафарро ташкил медиҳад. Ҳудуди 40 дарсади аъзои ҳизб ҷавонон мебошанд. Раиси ҳизб президенти Тоҷикистон Эмомалӣ Раҳмон аст. Аксари аъзои ҳукумат, вакилони палатаи поёнии парлумон ва маҷлисҳои маҳаллии вакилони халқи вилоят ва шаҳру навоҳии ҷумҳурӣ аъзои ҲХДТ мебошанд.
