Сафорати Тоҷикистон дар Русия аз муассисаҳои таълимии ин кишвар дархост намудааст, ки барои иштироки бемамониати донишҷӯёни тоҷики муқими Русия дар рӯзи интихобот онҳоро аз таҳсил озод кунад.
Намояндаи расмии сафоратхонаи Тоҷикистон дар Русия Муҳаммад Эгамзод ба ОИ «Азия-Плюс» дар ин робита иттилоъ дод, ки бо ин мақсад ба 121 муассисаи таълимии Русия чунин дархост ирсол карда шудааст.
Ба қавли ӯ, айни замон дар макотиби олии Русия беш аз 5 ҳазор нафар донишҷӯёни тоҷик таҳсил доранд, ки танҳо дар шаҳри Маскав шумори онҳо ҳудуди 1,4 ҳазор нафарро ташкил медиҳад.
«Мо мутмаинем, ки донишҷӯён як қисмати хеле фаъолу ватандӯсти ҷомеа ба шумор рафта, дастаҷамъона дар интихобот иштирок мекунанд. Дар давраи омодагӣ ба баргузории интихобот кормандони масъули сафорат бо роҳбарони ташкилотҳои донишҷӯёни тоҷики муқими Русия мулоқотҳо доир намуданд», – афзуд номбурда.
