Вазорати маориф ва илми ҷумҳурӣ дар ҳамдастӣ бо Муассисаи давлатии тозатаъсиси «Маркази миллии тестӣ» барои намояндагони шуъбаҳои маорифи шаҳру навоҳии ҷумҳурӣ оид ба шарҳи қоидаҳои нави қабул ба мактабҳои олии кишвар тариқи низоми мутамаркази супурдани имтиҳоноти қабул, ки соли равон дар Тоҷикистон бори нахуст роҳандозӣ мешавад, марҳилаи аввали омӯзишӣ доир намуданд.
Тавре ба ОИ «Азия-Плюс» як манбаъ аз МД «Маркази миллии тестӣ» хабар дод, дар марҳилаҳои дуюму сеюми омӯзишӣ, ки мутаносибан 13-18 ва 20-25-уми январ дар тамоми шаҳру навоҳӣ баргузор мешаванд, мудирони мактабҳои таҳислоти умумӣ, роҳбарони синфҳо ва падару модарони толибилмон фаро гирифта хоҳанд шуд, ки ба онҳо низ тартиби нави қабул ба макотиби олии кишвар шарҳу тавзеҳ дода мешавад.
Қобили зикр аст, ки ҳамасола макотиби таҳсилоти умумии Тоҷикистонро беш аз 50 ҳазор нафар толибилмон хатм мекунанд ва соли 2014 тариқи низоми мутамаркази супурдани имтиҳонот қабули 38 ҳазор нафари онҳо ба макотиби олии кишвар дар назар аст.
Ёдрас мекунем, ки санаи 20-уми декабри соли гузашта дар қисмати шимолии хиёбони Рӯдакии шаҳри Душанбе, дар рӯ ба рӯйи Боғи фарҳангию фароғатии Айнӣ бо иштироки Президенти кишвар Эмомалӣ Раҳмон бинои нави Муассисаи давлатии
«Маркази миллии тестӣ»
(ММТ) ифтитоҳ ёфт.
