Волидайни сарбоз Максим Усов, ки тибқи қарордод дар пойгоҳи низомии 201-уми Русия дар Тоҷикистон хизмати ҳарбӣ адо мекард, аз моҳи августи соли 2013 ӯро дар қаламрави Тоҷикистон ҷустуҷӯ доранд.
Ба гуфтаи онҳо, Максим Усови 21-сола, зодаи кишвари Красноярск, 19-уми августи соли 2013 бедарак шуда, дар бар сарулибоси мулкӣ, шиносномаи хориҷӣ, ноутбук ва телефон доштааст ва аз замони гум шуданаш дигар ба алоқа набаромадааст.
Ин хабар тавассути ҳамаи шабакаҳои иҷтимоии имконпазир аз номи Юрий Усов, ки худро падари сарбози гумшуда муаррифӣ мекунад, паҳн карда шуда, вале дар худи пойгоҳи низомии 201-ум саҳеҳияти ин маълумотро ба ОИ «Азия-Плюс» тасдиқ накарданд.
«Фарзияи роҳбаронаш дар бораи ба майнӯшиву айшу ишрат дода шуданашро ман инкор мекунам, зеро ӯ шароб истеъмол намекард. Барои ҳама гуна маълумот, маслиҳат ва тавсияҳо оид ба ҷустуҷӯи писарам миннатпазир хоҳам буд. Дар ин қазия ба ман нофаҳмост, ки чӣ гуна сарбоз метавонистааст бе ному нишон гум шавад? Охир ӯ дар дискотекаи деҳа набуд, ӯ дар сохтори низомии давлат хизмат мекард», – менависад Усов дар шабакаҳои иҷтимоии писандида.
Ёдрас мекунем, ки тибқи маълумоти ахир, дар қаламрави Тоҷикистон 7 ҳазор нафар низомиёни пойгоҳи 201-уми ҳарбии Русия хизмат мекунанд, ки ҷузъу томҳои он дар шаҳрҳои Душанбе, Кӯлоб ва Қӯрғонтеппа мустақаранд. Дар созишномаи соли гузашта баимзорасида муҳлати ҳузури пойгоҳи низомии 201-уми дар Русия то 49 сол дароз карда шуд.
Дар ҳамин ҳол, дар гӯшаи «Бедарак гумшудагон»-и сомонаи Вазорати корҳои дохилии Тоҷикистон ному насаби шаҳрванд Максим Усов дарҷ наёфтааст.
