Зимни нишасти хабарии рӯзи 16-уми январ сармуҳандиси ҶСШК «Барқи ҷануб» Шарифхон Исоев изҳор кард, ки сабаби қарзи музди меҳнат дар зерсохторҳои «Барқи тоҷик» дар вилояти Хатлон мушкили молии ширкат аст.
«Дар фасли тобистон беш аз 50% нерӯи барқро пойгоҳҳои обкашӣ истифода мекунанд. Барқ ба ин пойгоҳҳо бо нархи арзон, яъне бо назардошти арзиши иловагӣ 1,88 фурӯхта мешавад. Мутаассифона, раёсати хоҷагии оби вилоят ва хоҷагиҳои кишоварзӣ, ки ин пойгоҳҳо дар мувозинати онҳо қарор доранд, ҳаққи барқи истифодабурдаашонро саривақт пардохт намекунанд»,- гуфт номбурда.
Ба суоли он ки корхонаи онҳо дар назди кормандонаш чӣ миқдор маблағ қарздор аст, сармуҳандис бо қаҳр посух дод, ки «ин рақам ба Шумо чӣ лозим? Магар Шумо журналистон метавонед ин мушкилиро ҳал кунед?».
Дар ҳамин маврид сармуҳандиси корхона, ки дар ин нишаст ширкат дошт изҳор дошт, ки кормандони корхона тайи шаш моҳ аст, ки музди меҳнаташонро нагирифтаанд ва қарзи умумии корхона аз ҳисоби музди меҳнат 5,4 миллион сомониро ташкил медиҳад.
Бояд ёдовар шуд, ки қарзи музди меҳнат дар сохторҳои ширкати Барқи тоҷик дар вилояти Хатлон мувофиқи маълумотҳои расми зиёда аз 9 миллион сомониро ташкил медиҳад.
