Чанде қабл раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Қодири Қосим бо директори Бонки аврупоии таҷдид ва рушд (БАТР) оид ба кишварҳои Осиёи Марказӣ ҷаноби Масару Хонма мулоқот анҷом дод.
Бино ба иттилои хадамоти матбуоти Кумита, Қодири Қосим аз ҳамкориҳои дуҷониба ёдовар шуда, иброз намуд, ки ҳукумати Тоҷикистон дар самти беҳбуд бахшидани фазои сармоягузорӣ тамоми тадбирҳоро меандешад.
«Исботи ин гуфтаҳо сол аз сол зиёд гардидани сармояи мустақим ба иқтисодиёти Тоҷикистон, фароҳам овардани шароити мусоид барои соҳибкорӣ, ҳавасмандии ширкатҳои бонуфузи хориҷӣ дар тендерҳои сармоягузорӣ мебошад, ки дар натиҷа ҷойҳои нави корӣ таъсис ва сатҳи камбизоатии мардум пайваста коҳиш меёбад», – гуфт ӯ.
Ба иттилои манбаъ, инчунин дар мулоқот масоили ҳамкорӣ бо ин муассисаи бонуфузи молиявӣ дар доираи лоиҳаҳо, аз ҷумла таҷдиди системаи қубурӣ ва корезӣ дар шаҳри Хоруғ, сохтани корхонаҳои истеҳсоли обҳои маъдании шифобахш дар Вилояти Мухтори Кӯҳистони Бадахшон ва реструктуризатсияи “Барқи тоҷик”, “Тоҷик Эйр” баррасӣ шуд.
Гуфта мешавад, Масару Хонма ба тадбирҳои Ҳукумати Ҷумҳурии Тоҷикистон оид ба беҳсозии фазои сармоягузорӣ ва соҳибкорӣ баҳои баланд дода, изҳор дошт, ки Бонки аврупоии таҷдид ва рушд омода аст, дар самтҳои мухталифи иқтисодиёт аз ҷумла оид ба навсозии нерӯгоҳи обии Қайроқум ва татбиқи дигар лоиҳаҳои гидроэнергетикии Тоҷикистон ҳамкорӣ намояд. Бо қаноатмандӣ зикр гардид, ки айни ҳол дар Тоҷикистон чандин лоиҳаҳо бо дастгирии молиявии Бонки аврупоии таҷдид ва рушд амалӣ мешаванд.
