Чанде қабл сокинони деҳоти наздимарзии Хоҷа Аъло ва Чоркӯҳи шаҳри Исфараи Тоҷикистон ва ҳамчунин Самрқандак ва Актатири ноҳияи Ботканди Қирғизистон як шанбегии муштарак гузаронида, канали панҷкилометраи обёриро тоза карданд.
Тавре ба «Азия-Плюс» як манбаъ аз ҳукумати вилояти Суғд хабар дод, канали мазкур аз деҳаи Хоҷа Аъло сарчашма гирифта, то деҳаи Самарқандаки Қирғизистон ҷорӣ мешавад.
Ба гуфтаи манбаъ, дар шанбегӣ беш аз се ҳазор нафар шаҳрвандони Тоҷикистон ва ҳудуди 100 тан аз шаҳрвандони кишвари ҳамсоя иштирок кардаанд. «Шанбегӣ дар фазои ҳусни тафоҳуму дӯстӣ ва анъанаҳои неки ҳамҷаворӣ баргузор шуд», – афзуд манбаъ.
