Дар доираи омодагиҳо ба ҷашни 90-солагии мақоми пойтахти кишварро доро гардидани шаҳри Душанбе ва ба истиқболи 17-умин солгарди Рӯзи ваҳдат мақомоти шаҳрдории пойтахт тӯйи арӯсию домодии 90 ҷуфт навҷавонон ва хатнасури 360 кӯдакон аз оилаҳои ниёзмандро баргузор мекунад.
Бино ба иттилои хадамоти матбуоти мақомоти шаҳрдории пойтахт, дар иҷлосияи ҳаждаҳуми Маҷлиси вакилони халқи шаҳри Душанбе даъвати чорум дар ин бора тасмим гирифта шудааст.
Ба иттилои манбаъ, дар иҷлосия ҳамчунин масъалаи омодагии пойтахт ба мавсими тирамоҳу зимистони оянда низ барррасӣ шудааст.
«Дар иҷлосия ба масъалаҳои марбут ба риояи меъёрҳои санитария дар шаҳр, ҳифзи ҳуқуқҳои истеъмолгарон, фаъолияти хадамоти бартараф сохтани садамаҳо дар қубурҳои оби гарм, таъмини аҳолӣ бо оби нӯшокӣ ва дигар масъалаҳои мубрами хоҷагидории пойтахт низ таваҷҷуҳ зоҳир шуд», – иттилоъ медиҳад мақомоти шаҳрдорӣ.
