Шурӯъ аз шоми имрӯз то 25-уми май аз соати 18 то 23 ҳаракати нақлиёт дар майдони марказии пойтахт – «Дӯстӣ» манъ карда мешавад. Дар ин бора ба «Азия-Плюс» як манбаъ аз Шуъбаи БДА Раёсати ВКД Тоҷикистон дар шаҳри Душанбе хабар дод.
Ба гуфтаи манбаъ, дар ин вақт дар майдон машқи гузашти низомии ахири моҳи май пешбинишуда ба муносибати 20-умин солгарди таъсиси нерӯҳои марзбонии Тоҷикистон доир мегардад.
Ёдрас мекунем, ки ин гузаштаи низомӣ бо иштироки беш аз 10 ҳазор афсарону сарбозони Сарраёсати нерӯҳои марзбонии КДАМ, ВКД, Вазорати мудофиа, Кумитаи ҳолатҳои фавқулода ва мудофиаи гражданӣ, Гвардияи миллии ҷумҳурӣ ва ҳамчунин Сарраёсати иҷрои ҷазои ҷиноятии Вазорати адлияи ҷумҳурӣ баргузор мешавад.
Ба гузашти низомӣ фармондеҳи гарнизони Душанбе генерал-майор Бахтиёр Рӯзминшоев сарварӣ карда, гузаштро фармондеҳи нерӯҳои марзбонии Тоҷикистон генерал-лейтенант Раҷабалӣ Раҳмоналӣ қабул мекунад.
