Санаи 7-уми июни соли ҷорӣ вазири корҳои дохилӣ генерал-лейтенанти милитсия Раҳимзода Рамазон Ҳамро роҳбари Намояндагии Раёсати Комиссари Олии Созмони Милали Муттаҳид оид ба гурезаҳо дар Ҷумҳурии Тоҷикистон Кевин Алленро ба ҳузур пазируфт.
Бино ба иттилои сомонаи расмии ВКД ҶТ, дар ҷараёни вохӯрӣ ҷонибҳо масъалаҳо оид ба гурезаҳо, шахсони паноҳҷӯянда ва бешаҳрвандиро мавриди баррасӣ қарор дода, изҳор намуданд, ки ҳамкориҳоро дар ин самт боз ҳам густариш хоҳанд дод.
Зимни вохӯрӣ Вазири корҳои дохилӣ қайд намуд, ки «Вазорати корҳои дохилӣ, ҳамчун мақоми ваколатдор оиди ташкил ва ба танзим даровардани фаъолият дар самти муайян намудани мақоми гуреза чораҳои зарурӣ меандешад. Дар сохтори Вазорати корҳои дохилӣ шӯъбаи алоҳида оид ба масоили гурезаҳо ва шахсони паноҳҷӯянда ва бешаҳрванд фаъолият менамояд, ки онҳоро ба қайд гирифта, аризаю дархости онҳоро мутобиқи қонунгузории Ҷумҳурии Тоҷикистон баррасӣ менамояд».
Мавриди қайд аст, ки бо Фармони Вазири корҳои дохилии Ҷумҳурии Тоҷикистон Комиссияи муштарак оид ба ҳалли масъалаҳои гурезаҳо амал менамояд, ки дар он намояндагон аз вазорату идораҳои дахлдор шомил мебошанд.
Дар ҷараёни вохӯрӣ ҷонибҳо оид ба лоиҳаи алоҳидаи Қонуни Ҷумҳурии Тоҷикистон «Дар бораи гурезаҳо» табодули афкор намуда, қайд карданд, ки лоиҳаи қонуни мазкур аз ҷониби гурӯҳи кории байниидоравӣ дар таҳрири нав коркард шуда, ба Парламенти Ҷумҳурии Тоҷикистон ирсол гардидааст.
