Ҳайати ҳукумати вилояти Суғд таҳти сарварии раиси вилоят Абдураҳмон Қодирӣ пагоҳ озими кишвари Олтойи Русия мешаванд.
Тавре ба «Азия-Плюс» як манбаъ аз ҳукумати вилоят хабар дод, дар ҷараёни дидору гуфтушунид бо мақомоти раҳбарии кишври Олтой масъалаҳои ҳамкориҳои дуҷонибаи минтақавӣ дар бахши саноату кишоварзӣ ва танзими муштаракаи раванди муҳоҷирати меҳнатӣ мавриди баррасӣ қарор мегиранд.
«Дар ҷараёни сафар дидору гуфтушунидҳо бо губернатори ин кишвар Александр Карлин, раиси маҷлиси қонунгузории Олтой Иван Лоор, намояндагони доираҳои тиҷоратӣ ва диаспораҳои тоҷикон дар назар аст», – гуфт манбаъ.
Зимнан зикр гардид, ки аз рӯи натиҷаҳои ин сафар миёни ҳукумати кишвари Олтой ва мақомоти иҷроияи маҳаллии ҳокимияти давлатии Суғд созишномаҳо дар бораи ҳамкориҳои иқтисодиву тиҷоратӣ, илмиву техникӣ ва фарҳангӣ ба имзо хоҳанд расид.
