Дар ҷаласаи навбатии Шӯрои миллии Тоҷикистон оид ба муқовимат бо коррупсия, ки имрӯз дар Душанбе таҳти раёсати нахуствазири ҷумҳурӣ Қоҳир Расулзода доир гардид, нақшаи кории Шӯро барои солҳои 2014-2015 тасдиқ карда шуд. Дар ин бора ба «Азия-Плюс» узви Шӯро, раиси Иттиҳоди журналистони Тоҷикистон Акбаралӣ Сатторов хабар дод.
Ба гуфтаи ӯ, назди аъзои Шӯро дар бораи фаъолият оид ба иҷрои тавсияҳои созмонҳои байнулмилалӣ дар самти муқовимат бо коррупсия роҳбарони Агентии назорати давлатии молиявӣ ва мубориза бо коррупсия ва Прокуратураи генералии Тоҷикистон гузориш доданд.
«Шӯро ҳамчунин муқаррароти намунавии комиссияҳои муқовимат бо коррупсияро, ки дар назди мақомоти ҳокимияти давлатии тамоми шаҳру навоҳӣ ва вилоятҳо таъсис дода мешаванд, низ тасдиқ намуд», – қайд кард Сатторов.
Зимнан зикр гардид, ки дар кори ҷаласаи Шӯро ба ҷуз аъзои он, ҳамчунин роҳбарони чанде аз созмонҳои байнулмилалии муқими Душанбе низ ширкат варзиданд.
