Шоми рӯзи 25-уми август дар марзи Тоҷикистону Қирғизистон, дар қаламрави ноҳияи Бобоҷон Ғафурови вилояти Суғд муноқишаи навбатии мусаллахона рух дода, панҷ тан аз шаҳрвандони Тоҷикистон аз тири силоҳи оташфишон захмӣ шуданд.
Тавре ба «Азия-Плюс» як манбаъ аз ҳукумати вилояти Суғд хабар дод, муноқиша дар мавзеи Хоҷа Боқирғон, ки ҷониби Қирғизистон баҳри азсаргирии сохтмони пул аз болои рӯди ҳамноми ин мавзеъ талош варзидааст, ба вуқӯъ пайвастааст, лекин шаҳрвандони Тоҷикистон кӯшиш кардаанд, ки ба оғози дубораи сохтмонни пул монеъ шаванд.
«Дар натиҷаи тирандозӣ аз ҷониби марзбонони қирғиз панҷ нафар сокинони деҳаи Қалъача захмӣ шуда, марзбонони тоҷики ба ҷойи ҳодиса ҳозиршуда аз силоҳи оташфишон истифода накардаанд», – гуфт манбаъ.
Ба гуфтаи ӯ, субҳи имрӯз вазъ дар ҷойи ҳодиса таҳти назорати марзбонони тоҷик қарор дорад. «Шаҳрвандони тоҷики захмишуда дар бемористон бистарӣ шуданд», – афзуд сарчашмаи хабар.
