Дар мусобиқаи Чемпионати ҷаҳон оид ба дзюдо, ки аз 25 то 31-уми август дар шаҳри Челябински Русия доир гардид, намояндагони Тоҷикистон ягон медал ба даст оварда натавонистанд.
Бино ба иттилои Кумитаи миллии олимпии ҷумҳурӣ, 9 варзишгари ҳайати дастаи мунтахаби Тоҷикистон дар рақобатҳои инфиродӣ ноком шуда, аз ҳаққи идомаи мубориза барои медалҳо маҳрум гаштанд.
Ба ҳайати мунтахаби Тоҷикистон 9 варзишгар шомил буданд: Каъбатулло Аминов (60 кг), Расул Абдушарифов (66 кг), Самандар Қаландаров (66 кг), Саидмухтор Расулов (73 кг), Фарход Раҳимов (81 кг), Комроншоҳи Устопириён (90 кг), Саидҷалол Саидов (90 кг), Дадахон Қурбоналиев (100 кг) ва Муҳаммадмурод Абдураҳмонов (+100 кг).
Дар мусобиқаи умумидаставӣ тими мунтахаби Ҷопон бар дастаи соҳибони майдон дастболо шуда, ғолиби мусобиқа дониста шуд. Русия мақоми дуюм ва дастаҳои Олмону Гурҷистон ба медалҳои биринҷӣ сазовор гардиданд.
Қобили зикр аст, ки дар мусобиқаи қаҳрамонии ҷаҳон дар риштаи дзюдо дар Русия аз 110 кишвари дунё 639 нафар варзишгарон ширкат варзиданд. Дар мусобиқа барои 14 маҷмӯаи медалҳо қувваозмоиҳо сурат гирифтанд.
