Дар робита ба таъмини шаҳрвандони Тоҷикистон бо шиносномаҳои биометрии хориҷӣ, Тоҷикистон ба фаъолияти намояндагии дипломатии худ дар Русия тақвият мебахшад.
Намояндаи расмии сафорати Тоҷикистон дар Русия Муҳаммад Эгамзод ба «Азия-Плюс» дар ин робита изҳор намуд, ки бо дастури муовини аввали вазири корҳои хориҷии ҶТ Озода Раҳмон якчанд кормандони шуъбаи консулгарии дастгоҳи марказии вазорат ба сафорат сафарбар шудаанд, ки дар ҳамдастӣ бо кормандони хадамоти консулгарӣ аллакай дар ин самт фаъолият доранд.
«То ифтитоҳи нуқтаҳои иловагии таъмини шаҳрвандони Тоҷикистон бо шиносномаҳои биометрии хориҷӣ дар шаҳрҳои Санкт-Петербург, Новосибирск ва Краснодар, кормандони вазорат алҳол дар нуқтаҳои амалкунанда дар консулгарӣ дар Маскав ва консулгариҳои генералӣ дар шаҳрҳои Екатеринбург ва Уфа кор хоҳанд кард», – гуфт ӯ.
Ба қавли Эгамзод, масъалаи кушодани нуқтаҳои иловагии зикршуда айни замон бо мақомоти марбутаи Русия мувофиқа мешавад.
Дар ҳамин ҳол, роҳбари хадамоти консулгариии сафорати ҶТ дар Русия Ашраф Гулов ба кормандонаш дастур додааст, ки ҳар як шаҳрванди тоҷики ба консулгарӣ муроҷиаткардаро бао шиносномаи биометрӣ таъмин кунанд.
«Масалан, чанде қабл кормандони консулгарӣ то соати 23-00 ба навбати хеле зиёди иборат аз шаҳрвандони Тоҷикистон, ки хоҳиши гирифтани шиносномаи биометрии хориҷиро доштанд, хизматгузорӣ карданд», – афзуд намояндаи расмии сафорат.
