Дар маросими муаррифии Гузориши иқтисодии минтақавии Хазинаи байнулмилалии асъор (ХБА) рӯзи панҷшанбеи ҳамин ҳафта дар Душанбе раиси Бонки миллии Тоҷикистон (БМТ) Абдуҷаббор Ширинов изҳор намуд, ки соли равон ҳаҷми интиқоли маблағҳои муҳоҷирони тоҷик ба ҷумҳурӣ тақрибан 6% камтар шуд.
Сабаби коҳиши ҳаҷми интиқоли маблағҳои пулии муҳоҷирон аз хориҷи кишварро раиси БМТ ба низоъ миёни Русияву Украина ва ҷорӣ шудани таҳримҳо нисбати Русия аз ҷониби кишварҳои Ғарб марбут донист.
Ширинов эътироф намуд, ки аз миқёси бештари коҳиши ҳаҷми интиқоли маблағҳои пулии муҳоҷирони кории тоҷик интизорӣ дошт ва аз чунин ба амал наомадани вазъ қаноатмандӣ изҳор кард.
Гузашта аз ин, ӯ зикр кард, ки ҳаҷми интиқоли маблағҳои пулии муҳоҷирон бо рубли русӣ аз нишондиҳандаи ҳамин давраи соли гузашта зиёдтар аст, лекин агар он бо қурби ҳозираи доллари ИМА ҳисоб шавад, сатҳи коҳиш тақрибан 6%-ро ташкил медиҳад. «Ин ба он вобаста аст, ки соли ҷорӣ рубли русӣ нисбати доллар ба таври қобили мулоҳиза поин рафт», – иброз дошт раиси БМТ.
Дар ҳамин ҳол, дар робита ба коҳиши қурби сомонӣ нисбати доллари ИМА, Ширинов қайд кард, ки айни замон дар аксари кишварҳои минтақа ва саросари ҷаҳон чунин тамоил ба мушоҳида мерасад. «Асъори миллии бисёр кишварҳои дигар нисбат ба арзи миллии тоҷикӣ бештар беқурб шуданд», – таъкид дошт ӯ.
