Соли 2015 барои рушди бахши маорифи вилояти Суғд аз буҷети вилоятӣ 595,8 млн. сомонӣ маблағ ҷудо мегардад, ки аз ҳаҷми умумии буҷети соли оянда 46%-ро ташкил медиҳад.
Тавре ба «Азия-Плюс» аз Раёсати маорифи ҳукумати вилояти Суғд хабар доданд, соли равон аз буҷети вилоят ба соҳаи маориф 522 млн. сомонӣ маблағ ҷудо гардида буд, ки нисбат ба буҷети соли 2013 ба миқдори 103 млн. сомонӣ бештар аст.
Ба иттилои манбаъ, ин воситаҳо асосан ба таъмиру азнавсозӣ ва беҳтар намудани шароити таҳсил дар муассисаҳои таълимӣ равона гардиданд. «Тибқи Барномаи давлатии сохтмон, таъмир ва азнавсозии мактабҳо барои солҳои 2008-2015, 14 синфҳое, ки дар манзилҳои хусусӣ, вагонҳо ва биноҳои маъмурӣ ҷойгир шуда буданд, ба дигар ҷойи мувофиқ кӯчонида шуда, бинои 6 мактаби сохтмонаш нотамом пурра таъмир ва мавриди истифода қарор гирифт», – гуфт манбаъ.
Зимнан зикр гардид, ки давоми соли 2014 дар 21 иншооти бахши маорифи вилоят корҳои таъмиру таҷдид ба анҷом расида, аз ин миқдор 8 иншоот бо воситаҳои буҷети вилоят, 5 иншоот тариқи ҳашар ва 8 иншоот аз ҳисоби маблағҳои сарчашмаҳои дигар таъмиру азнавсозӣ шудааст.
«Аз ҳисоби маблағҳои буҷети вилоят мактабҳо бо 5 ҳазору 720 адад ва аз ҳисоби маблағҳои шахсони ҷудогона бо 1 ҳазору 200 адад маҷмӯи мебелу лавозимоти зарурӣ таъмин карда шуданд», – афзуд сарчашмаи хабар.
