Дар доираи форуми «Тарбиятгарии зуд», ки аз ҷониби Фонди АвруОсиё Осиёи Марказӣ – Тоҷикистон ва палатаи амрикоӣ (АмЧам) созмон дода шуд, дар меҳмонхонаи «Шератон» роҳбарон ва менеҷерҳои ширкатҳо ва корхонаҳои бузурги Тоҷикистон бо донишҷӯён мулоқот ороста, бо онҳо табодули таҷриба намуданд.
Тавре аз Фонди мазкур хабар доданд, ҳадафи аслӣ аз баргузории чорабинӣ таъмини дастрасии ҷавонон ба машварату тавсияҳои тоҷирони соҳибкасбу варзида буда, ин чорабинӣ баҳри дастгирии соҳибкорӣ ва рушди бахши хусусӣ равона шудааст.
Дар доираи кори форум беш аз 30 нафар донишҷӯёни бахшҳои иқтисодии макотиби олии пойтахт имкон пайдо намуданд, ки бо ҳар кадоме аз тоҷирони муваффақ мустақиман мулоқот карда, ба саволҳои худ посух дарёбанд.
Директори Палатаи савдои амрикоӣ дар Тоҷикистон (АмЧам) Илҳом Маҳкамбоев дар робита ба кори форум изҳор намуд, ки таҷрибаи андӯхтаи ҷавонон дар чорабинии имрӯза ба онҳо минбаъд дар мустақилона роҳандозӣ намудани тиҷорат мусоидат мекунад. «Мо бар ин назарем, ки рушди Тоҷикистон тавассути рушди бахши хусусӣ имконпазир аст ва мо бояд ҷавононро ба ташабуусу созандагӣ дар ин самт ҳидоят созем», – гуфт номбурда.
