Раиси Ҳизби коммунисти Тоҷикистон, вакили палатаи поёнии парлумон Шодӣ Шабдолов бар ин назар аст, ки аз моҳи апрел ба моҳи январ гузаронидани санаи ироаи паёми президент ба парлумон тасмими дуруст аст.
Ба гуфтаи ӯ, ҳадафҳои президент ва ҳукумат оид ба сиёсати дохилӣ ва хориҷӣ, вазифаҳои иҷтимоиву иқтисодӣ мантиқан бояд аввали соли молиявӣ гузошта шаванд, ки дар Тоҷикистон 1-уми январ оғоз мегардад.
«Иҷрои вазифаҳое, ки президент назди ҳукумат ва мақомоти дахлдор дар моҳи апрел зимни ироаи паём мегузорад, хеле душвор аст, чунки барои иҷрои онҳо воқеъан ҳам 7-8 моҳ боқӣ мемонад», – иброз дошт раиси ҲКТ.
Дар идома ӯ изҳори итминон кард, ки минбаъд ироаи паёмҳои ҳамасолаи президент ба парлумон аввали сол сурат мегиранд. «Чунин таҷриба дар Русияву Қазоқистон ва бисёр кишварҳои дигари ҷаҳон роиҷ аст», – афзуд Шабдолов.
