Дар конфронси бахши Ҳизби халқии демократии Тоҷикистон дар шаҳри Ваҳдат роҳбари Ассотсиатсияи ҳуқуқшиносони ҷавони ҷумҳурӣ Ҷамшед Муртазоқулов аз ҳавзаи якмандатии интихоботии ин шаҳр номзад ба вакилӣ дар парлумон пешбарӣ шуд.
Бино ба иттилои як манбаъ аз ҲХДТ, Ҷ.Муртазоқулов соли 2000 барои дарёфти унвони номзади илмҳои ҳуқуқшиносӣ дар мавзӯи «Мақоми шаҳрвандӣ-ҳуқуқии хоҷагиҳои деҳқонӣ (фермерӣ) тибқи қонунгузории Тоҷикистон» диссертатсия ҳимоя намуда, соли 2012 дар Академияи хоҷагии халқ ва хизмати давлатии назди президенти Русия дар мавзӯи «Мушкилоти шаҳрвандӣ-ҳуқуқии ташкил ва фаъолияти хоҷагиҳои деҳқонӣ (фермерӣ) дар Тоҷикистон» кори илмии докториашро ҳимоя кардааст.
Айни замон ӯ профессори кафедраи ҳуқуқи шаҳрвандии факултаи ҳуқуқшиносии Донишгоҳи миллии Тоҷикистон, раиси Ассотсиатсияи ҳуқуқшиносони ҷавони Тоҷикистон, узви Шӯрои илмӣ-машваратии Суди олии иқтисодии Тоҷикистон, дорандаи ҷоизаи Исмоили Сомонӣ (соли 2004) мебошад.
