Раиси Бонки миллии Тоҷикистон (БМТ) Абдуҷаббор Ширинов бар ин назар аст, ки калавиши қурби асъор дар бозори Тоҷикистон то замони ба эътидол омадани нархи нафт дар бозорҳои ҷаҳонӣ ва мутаносибан устувор шудани вазъ дар иқтисоди Русия идома меёбад. «Пешгӯӣ мешавад, ки нархи нафт нимсолаи аввали соли равон ба эътидол меояд», – иброз дошт вай.
Ба қавли Ширинов, соли гузашта қурби расмии арзи миллӣ нисбати доллари ИМА ба андозаи 11,2% поин рафта, дар бозори нақдии кишвар бошад, ин нишондиҳанда 10,7%-ро ташкил додааст.
Ӯ таъкид дошт, ки соли 2014 Бонки миллӣ баҳри нигаҳдории қурби арзи миллӣ 137 млн. доллари ИМА ва 984 млн. сомонӣ маблағ равона кард.
Раиси Бонки миллӣ фишори соли гузашта ба қурби асъорро дар навбати аввал ба «вазъи шадиди геополитикӣ дар минтақа ва суръати начандон кофии афзоиши иқтисоди шарикони асосии тиҷоратии Тоҷикистон» нисбат дод.
