Муҳиддин Кабирӣ, роҳбари Ҳизби наҳзати исломии Тоҷикистон ва вакили МН бо Абдураҳим Мутушев, ректори Донишгоҳи исломии Чеченистон ба номи “Канта-ҳоҷӣ” мулоқот карда, масоили марбут ба вазъи минтақа ва ифротгароиро баҳсу баррасӣ карданд.
Бино ба иттилои сомонаи расмии ҲНИТ, ин мулоқот рӯзи 19-уми январи соли 2015 баъди ширкат дар роҳпаймоии бузург барои ҳимоят аз Паёмбари Ислом (с) дар бинои донишгоҳ дар шаҳри Грозний анҷом ёфт.
Дар ин мулоқот Муҳиддин Кабириро Ҷамбулат Умаров, вакили парлумон ва раиси кумита оид ба робитаҳои байналмилалӣ ва байнипарлумонии парлумони Чеченистон ҳамроҳӣ кард.
Ректори Донишгоҳи исломии Чеченистон роҳбари Наҳзатро ба вазъи донишгоҳ ва манҳаҷи дарсии он ошно сохт. Муҳиддин Кабирӣ дар навбати худ аз вазъи минтақа ва мубориза ба ифротгароӣ суҳбат кард.
Баъди вохурӣ бо ректори донишгоҳ, роҳбари Наҳзат ва вакили МН бо муҳоҷирини тоҷики муқими Қавқоз дар яке аз толорҳои Донишгоҳи исломии Чеченистон мулоқот карда, роҳбари Наҳзат дар бораи вазъи кишвар, омодагии ҲНИТ ба интихоботи парлумонӣ ва ғайра суҳбат кард.
Лозим ба ёдоварӣ аст, ки Муҳиддин Кабирӣ бо даъвати расмии мақомоти Ҷумҳурии Чеченистони Русия барои ширкат дар роҳпаймоӣ алайҳи ифротгароӣ ва барои ҳимоят аз Паёмбари Ислом (с) дар шаҳри Грозний, рӯзи 18-уми январ вориди Чеченистон шуд.
Зимни роҳпаймоӣ, Муҳиддин Кабирӣ бо Рамазон Қодиров, раиси ҷумҳури Чеченистон низ мулоқот кард.
