Сафири Ҷумҳурии Тоҷикистон дар Ҷумҳурии Арабии Миср Хусрав Нозирӣ рӯзи16 феврали 2015 дар Қоҳира ба муовини вазири корҳои хориҷии Миср Ёсир Мурод даъватномаи ҳукумати Тоҷикистон ба унвони сарвазири Миср Иброҳим Маҳлабро ҷиҳати иштирок дар Конфронси байналмилалии сатҳи баланд роҷеъ ба татбиқи Даҳсолаи байналмилалии амал «Об барои ҳаёт», солҳои 2005-2015-ро супурд.
Ин конфронс мувофиқи қатъномаи Маҷмаи Умумии СММ 69/215 рӯзҳои 9-11 июни 2015 дар Душанбе баргузор хоҳад гардид.
Бино ба иттилои сафорати Тоҷикистон дар Миср, муовини вазири корҳои хориҷии Миср бо изҳори ташаккур аз даъватномаи мазкур ва бо қадрдонӣ аз нақши боризи Тоҷикистон дар баррасии масъалаҳои марбут ба захираҳои обӣ дар арсаи байналмилалӣ таъкид намуд, ки кишвараш ният дорад дар конфронси Душанбе дар сатҳи баланди шоиста ва ба таври фаъол иштирок кунад.
