Раиси шаҳри Душанбе Маҳмадсаид Убайдуллоев Нақшаи чорабиниҳо оид ба пешгирии таъсири хавфҳои эҳтимолӣ ба иқтисодиёти шаҳри Душанбе дар давоми солҳои 2015-2016-ро тасдиқ намуд.
Бино ба иттилои хадамоти матбуоти мақомоти шаҳрдории пойтахт, дар нақшаи мазкур ба сохторҳои дахлдор дарёфти сарчашмаҳои нави воридоти маблағ ба буҷет дар сурати афзоиши хавфи беруна ба иқтисоди шаҳр, кам кардани хароҷот тибқи баъзе моддаҳои буҷет, ба ҷуз самтҳои иҷтимоӣ дастур дода шудааст.
Дар нақшаи мазкур, худдорӣ кардан аз хароҷотҳои иловагии берун аз нишондиҳандаҳои дар буҷети соли ҷорӣ тасдиқшуда ва кам намудани шумора ва камхарҷу сарфакорона гузаронидани чорабиниҳои фарҳангию маърифатӣ ва илмию варзишӣ дар арафаи иду ҷашнвораҳо, аз ҷумла, фестивалҳо, конференсияҳо, семинарҳо, мизҳои мудаввар, озмунҳо, маҳфилҳо, намоишгоҳҳо, марафонҳо, мусобиқаҳои варзишӣ, шабҳои эҷодӣ, мулоқоту вохӯриҳо ва ҷашнҳои соҳавӣ тавсия дода шудааст.
Ҳамчунин дар нақшаи тасдиқшуда дастгирии соҳибкорони ватанӣ, фароҳам сохтани зиёда аз 21 ҳазор ҷойи корӣ дар шаҳр, бозбинии сиёсати рӯёнидани қарзҳо назди буҷет ва дигар тадбирҳои судманд пешбинӣ шудаанд.
