Рӯзи 27 апрели соли 2015 дар шаҳри ал-Кувайт машваратҳои сиёсӣ байни Вазоратҳои корҳои хориҷии Ҷумҳурии Тоҷикистон ва Давлати Кувайт баргузор гардиданд. Ҳайатҳои ҷонибҳоро муовини вазири корҳои хориҷии Тоҷикистон Низомиддин Зоҳидӣ ва муовини аввали вазири корҳои хориҷии Давлати Кувайт Холид Сулаймон Ҷоруллоҳ роҳбарӣ намуданд.
Бино ба маълумоти департаменти иттилооти ВКХ Тоҷикистон, ҳайатҳои ду кишвар масъалаҳои авлавиятноки муносибатҳои дуҷониба дар соҳаҳои сиёсат, тиҷорату иқтисод, нақлиёту энергетика ва фарҳангу маориф, ҳамкории ду кишвар дар чаҳорчуби Созмони Милали Муттаҳид ва созмонҳои дигари байналмилалӣ ва минтақавӣ, аз ҷумла Муколамаи ҳамкории Осиёро баррасӣ намуда, роҷеъ ба масъалаҳои байналмилалӣ ва минтақавии мавриди эҳтимоми муштарак мубодилаи афкор карданд.
Гуфта мешавад, ҷонибҳо ба зарурати тақвияти механизмҳои пешбурди робитаҳои иқтисодию сармоягузорӣ дар доираи фаъолиятҳои Комиссияи муштараки байниҳукуматӣ ва инчунин Фонди кувайтӣ оид ба рушди иқтисодии арабӣ таъкид намуданд.
