Барои беҳтарин нақши мард дар филми тоҷикии «Муаллим» Ҳунарманди мардумии Тоҷикистон Марат Орифов ба дарёфти ҷоизаи Ҷашнвораи 33-юми байнулмилалии кинои «Фаҷр» (25апрел – 2 май, Теҳрон) шарафёб гардид.
Аз киностудияи «Тоҷикфилм» ба «Азия-Плюс» дар ин робита иттилоъ доданд, ки ба Ҷашнвораи 33-юми байнулмилалии кинои «Фаҷр» дар Эрон аз ҷониби Тоҷикистон филми «Муаллим»-и коргардони шинохтаи тоҷик Носир Саидов пешниҳод гардид. Дар ин филм дар баробари Марат Орифов, нақшҳои асосиро ҳамчунин ҳунармандзани эронӣ Маҳнози Афшор ва ҳунарманди тоҷик Абдукарим Машрабов низ ба иҷро расонидаанд.
Филми «Муаллим» соли 2014 дар Тоҷикистон наворбардорӣ шуд. Рӯйдолдҳои он дар як гӯшаи дурдасти Тоҷикистон ба вуқӯъ мепайванданд. Саргузашти дар филм пешниҳодшуда тақдири ба ҳам гусастаи одамон дар нахустин солҳоин душвори 90-уми қарни гузашта аст, ки пур аз фоҷиаву дардҳост. Нахустнамоиши филми «Муаллим» 15 сентябри соли 2014 дар кохи кинои «Ҷомӣ»-и шаҳри Душанбе доир гардид.
