Президенти Тоҷикистон ба собиқадорони Ҷанги Бузурги Ватанӣ ва меҳнат, оилаҳои ҷанговарони дар фронт ҳалокшуда ва афроди барои ватан хизматкарда ба ифтихори ҷашни Ғалала ба ҳар кадоме 1500 сомонӣ маблағи пулӣ ҷудо намуд.
Тавре ба «Азия-Плюс» як манбаъ аз ҳукумати ҷумҳурӣ иттилоъ дод, ин кумакпулӣ ба беш аз 4 ҳазор нафар собиқадорони ҷангу меҳнат ва афроди барои ватан хизматкарда расонида мешавад.
Ба иттилои манбаъ, кумаки сарвари давлат ба муносибати ҷашни 70-умин солгарди Ғалаба дар Ҷанги Бузурги Ватанӣ дар маҳаллаҳои аҳолинишин аз ҷониби роҳбарони вазорату идораҳо, раисони шаҳру навохӣ ва раҳбарияти Ҳизби халқии демократии Тоҷикистон ба собиқадорон дастрас хоҳад шуд.
Бино ба маълумотии Шӯрои ҷумҳуриявии собиқадорони ҷанг ва коргарони ақибгоҳи ҷумҳурӣ, имрӯз дар Тоҷикистон 810 нафар собиқадорони Ҷанги Бузурги Ватанӣ (ҶБВ)-и солҳои 1941-1945 боқӣ монда, тақрибан 2518 нафар коргарони ақибгоҳи ҶБВ ва 16 нафар шаҳрвандон аз «оилаҳои дар ҶБВ ҳалокшуда» иқомат доранд.
