Комиссияи махсуси мақомоти шаҳрдории Душанбе имрӯз ба шиносоӣ бо мушкилоти сокинони маҳаллаи 65-уми пойтахт шурӯъ кард.
Тавре ба «Азия-Плюс» як манбаъ аз мақомоти шаҳрдории пойтахт дар ин робита иттилоъ дод, комиссияи ҳайаташ иборат аз намояндагони хадамоти коммуналӣ, шабакаҳои барқу обрасонӣ, роҳсозон, ҳамчунин мақомоти интизомиву фаъолони ҷомеаи шаҳрвандӣ муддати рӯз бо аҳолии маҳаллаи мазкур вохӯриву мулоқотҳо гузаронида, ба арзу шикоят ва пешниҳодоти онҳо расидагӣ мекунад.
«Наздики шом дар маҷлисгоҳи мактаби таҳсилоти миёнаи умумии №77-и ноҳияи Фирдавсӣ бо иштироки раиси пойтахт аз кори комиссия натиҷагирӣ шуда, ба хадамоти дахлдор ҷиҳати рафъи мушкилоти ошкоршуда дастуру супоришҳои мушаххас дода мешаванд», – зикр кард манбаъ.
