Рӯзи 14 май вазири корҳои дохилии Тоҷикистон генерал-лейтенанти милитсия Раҳимзода Рамазон Ҳамро бо ҳайати намояндагони Ҷумҳурии Мардумии Чин таҳти роҳбарии муовини сардори Раёсат оид ба таъмини тартиботи ҷамъиятии Вазорати бехатарии ҷамъиятии ин кишвар Ма Вэйя дидору гуфтушунид кард.
Бино ба иттилои маркази матбуоти ВКД ҶТ, дар вохӯрӣ масъалаҳои баргузории машқҳои муштараки тактикӣ-низомии зиддитеррористӣ байни мақомотҳои корҳои дохилии Тоҷикистон ва Чин дар шароити кӯҳсор мавриди баррасӣ қарор гирифтанд.
Гуфта мешавад, ҷонибҳо ҷузъиёти гузаронидани машқҳои тактикӣ-низомии якҷояро мавриди муҳокима қарор дода, фикру андеша ва таклифҳои худро иброз доштанд.
Зикр мегардад, ки дар рафти мулоқот атрофи Нақшаи якҷояи гузаронидани машқҳои муштараки тактикӣ-низомии зиддитеррористӣ дар шароити кӯҳсор, ки аз ҷониби вазирони ҳарду ҷониб тасдиқ гардида, ба имзо расидааст, табодули назар сурат гирифт.
Ҳамчунин қайд мешавад, ки ба қарибӣ гузаронидани машқҳои муштараки тактикӣ-низомии зиддитеррористӣ дар шароити кӯҳсор байни Вазорати корҳои дохилии Тоҷикистон ва Вазорати бехатарии ҷамъиятии Чин дар назар дошта шудааст.
