Дар зарфи 4 моҳи соли равон ба Тоҷикистон ҳудуди 207 ҳазор тонна маҳсулоти нафтӣ ворид карда шуд, ки нисбат ба ҳамин давраи соли гузашта 17,5% камтар аст.
Тавре ба «Азия-Плюс» аз Агентии омори назди президенти ҶТ хабар доданд, тӯли 4 моҳи соли 2014 ба Тоҷикистон беш аз 250 ҳазор тонна маҳсулоти нафтӣ ворид гардида буд.
Ба иттилои манбаъ, воридкунандаи асосии маводи сӯхт ба Тоҷикистон аз хориҷи кишвар Русия боқӣ мемонад, ки ба ҳиссаи ин кишвар 85,7% аз ҳаҷми умумии маҳсулоти нафтии воридшаванда дар ин давра рост меояд. Ҳамчунин ба миқдори начандон зиёд тӯли 4 моҳи соли равон ба Тоҷикистон маҳсулоти нафтӣ аз Туркманистон (6,2%), Қазоқистон (4,1%), Қирғизистон (2,8%) ва дигар кишварҳо низ интиқол дода шудааст.
Бино ба маълумоти Хадамоти гумруки назди ҳукумати ҶТ, давоми моҳҳои январ-апрели соли равон ба Тоҷикистон дар ҳаҷми 98,3 ҳазор тонна бензин (ба маблағи 60,2 млн. $), 84,6 ҳазор тонна сӯзишвории дизелӣ (54,5 млн. $) ва 11 ҳазор тонна сӯзишвории авиатсионӣ (10,3 млн. $) ворид карда шудааст.
Тибқи маълумоти Агентии омор, ба Тоҷикистон соли 2012 — 373,7 ҳазор тонна, соли 2013 – 375,8 ҳазор тонна ва соли 2014 – 579,8 ҳазор тонна маҳсулоти нафтӣ ворид гардидааст.
Ёдрас мекунем, ки аввали соли равон мақомоти дахлдори марбут ба бахши энергетикаи Тоҷикистону Русия оид ба
тавозуни индикативии сӯзишворӣ дар соли 2015
ба мувофиқа расиданд. Тибқи тавофуқоти ҳосилшуда, соли ҷорӣ аз Русия ба Тоҷикистон бояд 830 ҳазор тонна маҳсулоти нафтӣ бидуни пардохти боҷи содиротӣ интиқол дода шавад.
Соли 2014 тавозуни индикативӣ барои Тоҷикистон 1 млн. тонна муқаррар шуда, аммо ба ҷумҳурӣ муяссар гардид, ки ҳамагӣ каме бештар аз нисфи ин миқдор маҳсулоти нафтиро аз Русия дастрас намояд.
