Рӯзҳои 20-21 майи соли 2015 дар шаҳри Гаага Конфронси вазирони Паймони Нерӯ баргузор гардид, ки дар он намояндагони зиёда аз 80 кишвари дунё ширкат варзиданд.
Тавре аз сафорати Тоҷикистон дар Брюссел хабар доданд, зимни конфронс намояндаи доимии Ҷумҳурии Тоҷикистон дар Иттиҳоди Аврупо сафир Рустамҷон Солиев ба таваҷҷӯҳи иштирокчиён оид ба иқтидори сармоягузорӣ дар соҳаи обӣ-энергетикии кишвар маълумоти муфассал манзур намуда, ҷонибҳоро ҷиҳати таҳкими муносибатҳои мутақобилан судманд даъват намуд.
Ҳамзамон, намояндаи доимии Тоҷикистон ба ҳозирин оид ба рафти омодагиҳо ба Конфронси байналмилалии сатҳи баланд роҷеъ ба натиҷаҳои татбиқи Даҳсолаи байналмилалии амал «Об барои ҳаёт», 2005-2015, ки 9-11 июни соли 2015 дар Душанбе баргузор мегардад, иттилоъ дод.
Гуфта мешавад, дар ҳошияи конфронс мулоқоти намояндаи доимии Тоҷикистон бо муовини ёвари котиби ИМА оид ба энергетика Робин Дунниган баргузор гардид, ки зимни он масъалаҳои дуҷонибаи қобили таваҷҷуҳ баррасӣ шуданд.
