Ҳамасола бо фарорасии санаи 26 июн – Рӯзи байналмилалии мубориза бар зидди маводи нашъаовар Агентии назорати маводи нашъаовари назди президенти ҶТ, бо ҷалби ҳамаи табақаҳои аҳолӣ маҷмӯи чорабиниҳои зиддимухаддиротӣ, аз ҷумла чорабиниҳои мухталифи фарҳангӣ-оммавӣ ва варзишӣ, “мизҳои мудаввар” барпо мекунад.
Бино ба иттилои маркази матбуоти Агентӣ, дар ҳамаи ноҳияҳои тобеи ҷумҳурӣ бахшида ба Рӯзи байналмилалии мубориза бар зидди маводи нашъаовар аз тарафи Агентӣ бо дастгирии Ҳукумати маҳаллӣ аз 16 июн то 26 июни соли 2015 чорабиниҳо ва иқдомҳо бар зидди маводи нашъовар бо иштироки намояндагони аҳли ҳунар ва ҷомеа гузаронида мешаванд. Озмунҳо барои муайян намудани шеърҳо, сурудҳо, расмҳои кӯдакон, намоишномаҳои беҳтарин дар мавзӯи зиддимухаддиротӣ ташкил ва гузаронида мешаванд.
Имсол ба муносибати Рӯзи байналмилалии мубориза бар зидди маводи нашъаовар аз тарафи Агентӣ бо дастгирии ҳукуматҳои маҳаллӣ чорабиниҳо оид ба мубориза бо маводи нашъаовар бо иштироки намояндагони аҳли ҳунар ва ҷомеа баргузор мегардад. Озмунҳо барои муайян намудани шеърҳо, сурудҳо, намоишномаҳои беҳтарин гузаронида мешаванд. Дар ноҳияҳои тобеи марказ, инчунин шаҳри Душанбе чорабиниҳои умумӣ, мусобиқаҳои варзишӣ оид ба велосипедронӣ, шоҳмот, кикбоксинг, таэквондо, дзю-до, гӯштингирӣ, волейбол, футбол, тенниси рӯимизӣ баргузор мегарданд, ки дар он хонандагони мактабҳои таҳсилоти умумӣ, донишҷӯёни мактабҳои олӣ, намояндагони идораҳои давлатӣ ва созмонҳои байналмилалӣ интирок хоҳанд кард. Дар Маркази кӯдакони пойтахт гузаронидани озмуни расми беҳтарини кӯдакона дар мавзӯи зиддимухаддиротӣ дар назар аст.
Инчунин гузаронидани як қатор вохӯриҳо бо намояндагони маориф дар назар аст, ки дар он масъалаҳои тарбияи зиддимухаддиротӣ дар муассисаҳои томактабӣ ва мактабҳо ба нақша гирифта шудааст.
Дар вилояти Суғд гузаронидани як силсила мусобиқаҳои варзишӣ дар мавзӯи зиддимухаддиротӣ, намоишномаи театрӣ, озмуни расми беҳтарин дар назар аст. Нақлиёти ҷамъиятӣ дар шаҳри Хуҷанд бо шиорҳои зиддимухаддиротӣ ороиш дода мешавад.
Дар шаҳру ноҳияҳои вилояти Хатлон гузаронидани як қатор чорабиниҳои варзишӣ-фарҳангӣ ба нақша гирифта шудааст.
Дар ВМКБ мусобиқаҳои варзишӣ оид ба гӯштингирӣ, муҳорибаи тан ба тан, волейбол, футбол ва шоҳмот гузаронида мешаванд. Дар телевизони вилоятӣ “Бадахшон” барномаи телевизионӣ таҳия ва пахш мегардад.
Чорабиниҳои дар боло зикр гардида дар доираи амалӣ намудани “Стратегияи миллии мубориза бар зидди гардиши ғайриқонунии маводи мухаддир дар Ҷумҳурии Тоҷикистон барои солҳои 2013-2020” гузаронида мешаванд, ки он самтҳо ва вазифаҳои асосии сиёсати зиддимухаддиротии Тоҷикистонро муайян менамояд.
