– Созмони Ҳамкории Шанхай бояд ба таври фаврӣ ва муносиб ба таҳдидҳо ва хатарҳое, ки аз ифротгароӣ, терроризм, ҷинояткории муташаккили фаромиллӣ, гардиши ғайриқонунии маводи мухаддир ва киберҷиноятҳо ба вуҷуд меоянд, омода бошад», – чунин мешуморад президенти Тоҷикистон Эмомалӣ Раҳмон.
«Ягон давлат дар алоҳидагӣ наметавонад бо ин мушкилоти тезутунд, ки хусусияти ҷаҳонӣ дорад, мубориза барад», – изҳор дошт Э.Раҳмон имрӯз дар ҷаласаи Шӯрои сарони давлатҳои аъзои Созмони ҳамкории Шанхай.
Э.Раҳмон муҳимияти кӯшишҳои муштарак алайҳи «се адоват»-ро таъкид дошта, даъват кард, ки «кӯшишҳои якҷояро дар муборизаи зидди «се адоват» афзун намуда, ба ситезаҳои мавҷуда зарбаи қатъӣ зада, ба бархурд бо хавфу хатарҳои нав омода бошем».
Президенти Тоҷикистон бар ин назар аст, ки дар давраи пешорӯ Созмони ҳамкории Шанхай бояд нисбат ба насли наврас ғамхории хосса зоҳир намояд.
Ӯ таъкид дошт, ки бӯҳрони иқтисодии ҷаҳонӣ маҳз ба ҷавонон таъсири зараровар расонид. «Насли ҷавони мо шоистаи бовар доштан ба фардо аст ва мо бояд барои ин бештар саъю кӯшиш намоем. Дар ин росто роҳ надодан ба ҷалби ҷавонон ба ҷунбишҳои мухталифи ифротӣ бояд мақсади асосии мо гардад», – гуфт Э.Раҳмон.
