Зимни суханронӣ дар дар ҷаласаи Шӯрои сарони давлатҳои аъзои Созмони ҳамкории Шанхай дар Уфа президенти Тоҷикистон Эмомалӣ Раҳмон изҳор намуд, ки Тоҷикистон қарор дар мавриди оғози маросими қабули Ҳиндустон ва Покистонро ба СҲШ дастгирӣ менамояд.
«СҲШ- созмони нодиру дилхоҳи замон аст, ки дар ҷаҳон нуфузи баланд дорад. Тоҷикистон қарор дар мавриди оғози маросими қабули Ҳиндустон ва Покистонро ба Созмон дастгирӣ менамояд, ки ин принсипи ошкоро будани cозмони моро инъикос менамояд. Бовар дорем, ки дар ояндаи наздиктарин Ҷумҳурии Исломии Эрон низ ба қатори аъзои баробарҳуқуқи ташкилоти мо дохил мешавад.», – гуфт Эмомалӣ Раҳмон.
Эмомалӣ Раҳмон ҳамчунин зикр кард, ки Тоҷикистон ҳамчунин ҷонибдори таҳкими институти нозиронем ва ба қатори онҳо дохил шудани Ҷумҳурии Беларусро қабул дорад. «Бо қаноатмандӣ тавсеаи гурӯҳи кишварҳои шарикро оид ба муколама ва дар қатори онҳо пайдо шудани Озарбойҷон, Арманистон, Непал ва Камбоҷаро зикр менамоем», – қайд кард сарвари давлати Тоҷикистон.
Айни замон Қазоқистон, Чин, Қирғизистон, Русия, Тоҷикистон ва Ӯзбекистон кишварҳои аъзои Созмони ҳамкории Шанхай мебошанд.
Афғонистон, Покистон, Ҳиндустон, Эрон ва Муғулистон мақоми нозир дар Созмонро доранд.
Як қатор кишварҳои дигар, аз ҷумла Озарбойҷон, Арманистон, Бангладеш, Белорус, Шри-Ланка, Сурия, Украина, Малдив, Камбоҷа, Миср низ додани мақоми нозир ё шарик оид ба муколама дар СҲШ-ро дархост намуданд.
