Тайи 6 моҳи соли равон ҳаҷми интиқоли маблағҳои пулӣ ба Тоҷикистон аз ҷониби муҳоҷирони корӣ тариқи Бонки давлатии амонатгузории «Амонатбонк» 39,6% коҳиш ёфт.
Раиси «Амонатбонк» Руҳулло Ҳакимзода зимни нишасти хабарии имрӯза дар ин робита изҳор намуд, ки нимсолаи аввал шахсони воқеӣ тариқи «Амонатбонк» ба Тоҷикистон каме бештар аз 173,7 млн. доллари ИМА (ҳамин давраи соли 2014 – беш аз 288 млн. доллари ИМА) маблағ фиристодаанд.
Коҳиши интиқоли маблағҳои пулӣ аз хориҷи кишварро роҳбари бонк ба буҳрон дар иқтисоди Русия бар асари таҳримҳои ҷоришудаи кишварҳои Ғарб нисбати ин давлат, ки муҳоҷирони кории тоҷик асосан дар он ҷо кор мекунанд, нисбат медиҳад.
«Дар навбати аввал ин ба ноустувории қурби рубли русӣ марбут аст, зеро ҳаҷми зиёди интиқоли маблағҳои пулӣ ба Тоҷикистон маҳз бо ин пул сурат мегирад», – гуфт ӯ.
Бино ба маълумоти Бонки миллии Тоҷикистон, нимсолаи авали соли ҷорӣ ҳаҷми интиқоли маблағҳои пулӣ аз ҷониби муҳоҷирон дар маҷмӯъ 42% коҳиш ёфтааст.
