Раиси вилояти Суғд Абдураҳмон Қодирӣ ба ноҳияи Бобоҷон Ғафуров сафари корӣ анҷом дода, дар маросими ифтитоҳи бозори навбунёди «Ваҳдат», ки дар шафати шоҳроҳи Хуҷанд – Ғафуров ҷойгир шудааст, иштирок намуд.
Бино ба иттилои хадамоти матбуоти раиси вилоят, бозори навбунёди «Ваҳдат» дар масоҳати 3,8 гектар доман паҳн карда, он аз тарафи ҶСП «Фароз» бунёд шудааст ва дорои 130 мағозаи фурӯши масолеҳи сохтмонӣ, 300 нуқтаҳои фурӯши маводи сохтмонӣ, бинои маъмурии дуошёна, 2 ошхонаи замонавӣ, коргоҳи кафшергарӣ, нуқтаи фурӯши сӯзишворӣ, нуқтаи ташхиси техникиву таваққуфгоҳ аст. Барои фаъолияти шаффоф дар бозор 58 камераҳои назоратӣ насб шудааст.
Ҳамчунин барои хизматрасонии хуб барои аҳолӣ дар ҳудуди бозор утоқҳои хизматрасонии БДА «Амонатбонк», Раёсати ҳифзи муҳити зисти вилоят, Раёсати Агентии суғуртаи иҷтимоӣ ва нафақа таъсис ёфтааст, ки бо усули «Равзанаи ягона» фаъолият мебаранд.
Ба иттилои масъулон дар ҳолати пурра ба фаъолият пардохтани бозори навбунёди «Ваҳдат» беш аз 1 000 нафар шаҳрвандон бо ҷои кори доимии дорои шароити мусоид таъмин мешаванд.
