Кормандони сохторҳои қудратии Тоҷикистон яке аз ҳаммаслакони наздики собиқ муовини вазири мудофиаи ҷумҳурӣ, генерали ошӯбгар Абдуҳалим Назарзода полковники Раёсати Қушӯнҳои хушкигарди Вазорати мудофиаи кишвар Назар Сафаровро боздошт намуданд.
Тавре ба «Азия-Плюс» як манбаъ аз сохторҳои қудратии ҷумҳурӣ дар ин робита хабар дод, тибқи маълумоти мавҷуда, полковник Сафаров ба доираи дӯстони наздики генерали ошӯбгар шомил буда, дар баробари Назарзода ва наздикони нобудшудаи ӯ эшони Ҷунайдулло ва мулло Умар аз ошӯб огаҳӣ дошт ва дар омодакунии он фаъолона саҳм гузоштааст.
Зимнан зикр гардид, ки баъди фурӯ нишонидани ошӯби мусаллаҳона полковник Сафаров то замони ҳабс дар Душанбе пинҳон шуда, рӯзи якшанбеи ҳафтаи сипаришудаа боздошт шудааст.
Ёдрас мекунем, ки зимни амалиёти нерӯҳои қудратии ҷумҳурӣ алайҳи гурӯҳи ғайриқонунии мусаллаҳи генерали ошӯбгар Назарзода аз 4 то 16 сентябри соли равон 25 тан аз аъзои гурӯҳи ҷиноятпеша куштаву 125 нафар террористон боздошт шуданд. Мутаассифона, дар ҷараёни амалиёт 14 нафар кормандони сохторҳои қудратӣ низ ҷон бохтанд.
Қобили зикр аст, ки якчанд нафар аъзои гурӯҳи террористии мазкур ба гуноҳашон иқрор шуда, ихтиёран ба мақомоти ҳифзи ҳуқуқ таслим шуданд.
