Палатаи поёнии парлумон имрӯз ҳамроҳшавии Тоҷикистонро ба Конвенсияи байналмилалӣ оид ба соддагардонӣ ва ҳамоҳангсозии расмиёти гумрукӣ, ки моҳи майи соли 1973 дар шаҳри Киотои Ҷопон қабул шудааст, маъқул шуморид.
Бино ба иттилои сомонаи расмии палатаи поёнии парлумон, сардори Хадамоти гумруки назди ҳукумати ҶТ Абдуфатоҳи Ғоиб ва вакили мардумӣ Раҷабов Сафаралӣ зимни суханронии худ роҷеъ ба ҳамроҳшавии Тоҷикистон ба ин конвенсия изҳор доштанд, ки мақсади таҳияи Конвенсия дар таҳрири нав ин аз соддагардонӣ ва ҳамоҳангсозии расмиёти гумрукӣ ва қоидаҳои он иборат мебошад.
Гуфта мешавад, ҳамроҳшавии Тоҷикистон ба Конвенсия барои ҳавасмандгардонии фаъолияти тиҷорати хориҷӣ бо роҳи соддагардонӣ ва тезонидани марҳилаи ба расмиятдарорӣ ва назорати гумрукӣ бе маҳдуд намудани манфиатҳои давлат ва ҷомеа дар мавриди ситонидани боҷ ва андозҳо ва ҳимояи бозори дохила шароити мусоид фароҳам меорад.
«Мо ба он қисмати Конвенсия, ки масоили ташкили назорати гумрукӣ дар бандарҳои баҳрӣ ва истгоҳҳои киштиро танзим мекунад, ҳамроҳ намешавем, зеро кишвари мо роҳи баромад ба баҳрро надорад», – гуфт сардори Хадамоти гумруки ҶТ.
