Дар чаҳорчӯби 9-мин Форуми ҳамкории Ҷумҳурии Корея – Осиёи Марказӣ аввалин Намоишгоҳи тиҷоратӣ-сайёҳии кишварҳои узви Форум зери унвони “Road Show” баргузор гардид.
Бино ба маълумоти Вазорати корҳои хориҷии ҶТ, намоишгоҳи мазкур бо буридани лентаи рамзӣ аз ҷониби роҳбарони ҳайатҳо ифтитоҳ шуда, дар он асарҳои фарҳангӣ, намоиши имкониятҳои сайёҳӣ ва намунаи маҳсулоти корхонаҳои истеҳсолии хурду бузурги Ҷумҳурии Корея ва кишварҳои узви Форум ба намоиш гузошта шуданд.
Ҷумҳурии Тоҷикистонро дар Намоишгоҳи мазкур Вазорати фарҳанг, Кумитаи сармоягузорӣ ва идораи амволи давлатӣ, Кумитаи ҷавон, варзиш ва сайёҳӣ, Палатаи савдо ва саноат ва инчунин ширкатҳои ҶДММ “Исфарафуд”, ҶДММ “Абрикос”, ҶДММ “Макколӣ”, ҶДММ “Манучеҳр” ва хоҷагии асалпарварии “Кароматулло” муаррифӣ намуданд.
Дар доираи Намоишгоҳи мазкур созишномаҳои ҳамкорӣ миёни ширкатҳои Корея ва кишварҳои Осиёи Марказӣ, аз ҷумла Тоҷикистон ба имзо расонида шуданд.
