Пас аз анҷоми ҷаласаи навбатии Маҷлиси намояндагони Маҷлиси Олии Тоҷикистон раиси палатаи поёнии парлумон Шукурҷон Зуҳуров изҳори бовар кард, ки таҳқиқи ҳодисаи марги шаҳрванди 5-моҳаи Тоҷикистон Умаралӣ Назаров дар шаҳри Санкт-Петербург воқеъбинона сурат гирифта, гунаҳкорон ҷазои сазовор мегиранд.
Ш.Зуҳуров таъкид дошт, ки аз рӯзҳои аввали ин фоҷеа дар оилаи Назаровҳо палатаи поёнии парлумони ҷумҳурӣ мудом аз рӯи ин масъала бо Думаи Давлатии Русия дар тамос аст.
«Ман ба раиси Кумитаи оид ба мудофиа, тартиботи ҳуқуқӣ ва амният Ҷӯрахон Маҷидов дастур додам, ки ҳамарӯза бо гурӯҳи тафтишотое, ки ба муайян кардани сабабҳои марги кӯдак машғул аст, дар робита бошад ва ин дастур айни замон ба иҷро расида истодааст», – қайд кард Зуҳуров.
Раиси палатаи поёнии парлумон ба вакилон иттилоъ дод, ки бо дархости ӯ Думаи Давлатии Русия низ доимо бо гурӯҳи тафтишотии ин қазия дар тамос аст.
